Мон работан велеса, конань лемоц Конак. Конак валсь етафтови кода инжи. Стане и лисенди. Сембе ломаттне тяса инжиень и трудонь кельгихть, пара ваймот. Конак велесь инголи пяк оцюволь, ломаньда ламоль. Но пингонь етазь тяса эряйда лядонды коль кржа и кржа.
Мекольте пайгонесь школаса
Велесь ащи пяк цебярь вастса. Фкя ширде-пиже лугат, омбоцеса-пантт. Конаксь мазы сембе пинкнень эзда: тунда-акша и маковай садонзон мархта, конат нолдайхть таколфты и прянь шаракофты таньф; кизонда-танцти кстынзон и лугань мазы панчфонзон мархта, а сексесь-медень таньфонь марьса. Тялось кеняртьфты ляпе ловонзон, мялень кеподи ару кожфонц, пиндолды лешензон и вальмаса мазы рисунканзон мархта.
Тяса мазы аф аньцек перьфпяльсь, но и эряфсь.
Велеть песа путф оцю и валда кирпицень школа, коса тонафнихть аф аньцек Конак велень церанят и стирнят, но и лия велень шабат. Тя кизоть школаньконди топоди 45 киза. Сон панчфоль 1966 кизоня. Школаньке касфтсь и нолдась оцю эряфс аф фкя поколения. Синь етксост наукань кандидатт, республикань, райононь и эсь велень руководительхть.
Кизода кизос школаньке аф ащи фкя вастса. Шабатне оцю мяль вельде участвовандайхть кода школьнай, стане жа районнай и республиканскяй илатнень эса. Пяк мялезост олимпиадатне, коса занцихть призовой вастт.
Минь тонафниньке пяк кельгсазь морамаснон и кштимаснон, сяс и участвовандайхть «Конак» ансамбльть мархта.
Аф пяк кунара школасонк етась пяк оцю ила, кона лемтьф 9-це классонь тонафнихненди «Мекольдень пайгонясь». Ширезонк сашендсть представительхть районцта. Синь мялезост тусть тонафнихнень выступлениясна, конат аноклафтольхть выпускникненди. Пара валхт и арьсемат тейст азондсь Н. П. Козабаранов.
Выпускникне азсть оцю сюкпря эсь школань тонафтыхненди.
Минь арьсетяма, што школаньке нинге лама кизот кармай покодема и ноляма оцю эряфс Россиянь достойнай гражданитт и Родинань кельги ломатть!
