Кода содаф, аф лама пингта лядонды мокшэрзянь народть Российскяй государствань нароттнень мархта ладязь эрямаснон 1000 кизонь топодеманц праздновандаманцты.
Министерствась марса общественнай организациятнень, мокшэрзянь интеллигенциять мархта вятихть оцю аноклама тя илати.
Сяс и минь районцонк тяда ингольдень кизоть ётафтф ни аф фкя ила.
Тядте майть 17-й шистонза минь шачема – касома ширесонк, Вирь Келгуж велеса, етафтф озкс «Ведявати сюконямась». Штоба етафтомс тя афкукс эрявикс илать, кочкафтольхть районцта сембе творческяй коллектифне, клубонь и библиотекань покодихне: Вирь Келгужста, Вирь Ордажста, Чумартоваста, Од Тяльмоня велеста, Пандалдонь Конакста, Пурдошкаста, Сире Ковыляйста, Кушкста, Лаврентьеваста, Алексеевкаста, Темникав ошста.
Ся куженяти, коса етафтовсь илась, участникта башка кочкавсть Вирь Келгуж эряйхне, ламоль оцюда и од ломаньда шабра велетнень эздонга.
Энельдемась пиземонь максы шкабавазти – Ведявати ушедевсь сянь эзда…
… Тундань работада меле, мокшетне заботендайть сянь инкса, штоба Ведявась максоль модати пизем. Сянкса синь тийсть озкс. Озондама мольсть аньцек аватне. Сембонь ёткста кочкафоль «Озкс баба». Сон лиссь кудста палы штатол мархта аватнень ёткс и лятфтазень теест обрядонь ётафтама койхнень. Сембе озонды аватне кочкавсть и фкя-фкянь мархта вишкста корхнесть, штоба панемс велеста кяжи духнень – аф цебярьхнень.
Кядсост ульсть мантт, куйгорста тиф куймонят (жертвань максомс), мазы лентанят (келунять наряжамс), кошяльхть ярхцамбяль мархта.
Кода и кунардонь кизотнень эзда, мокшаватне озондсть священнай шуфтть ваксса, тяфтама шуфтокс лувондови келусь. Синь арсесть шамапяльде шилисема ширети, и шкайти эняльдемста кядьснон кепсезь вяри. Шкайти эняльдсть тяфта: «Шкабаваз, шивалдоняй, симдиняй, андыняй! Макст тейнек пиземня, штоба шачель лама сёрода, штоба
семьяньке кизоньберьф улельхть топоцтат!
Макст, Шкабаваз, макст!»
Сяда меле келусь наряфоль мазы лентаса, а алонза путфтольхть казнет – мокшень ярхцамбяльхть. Аф ичкозе келуть эзда тифоль толмар, конанц вельхкса пидевсь сиволь. Сивольсь явфневсь и путневсь куйгоронь куймонява, сяде меле аватне повфнезь келувонь тараттнеди - жертванди. Келуть перьф синь якафтсть и морсесть сире мокшень морот.
Обрядть пингста, бта модать алда, лиссь мудрай сире атя «Озкс атя». Сон лездсь эсь еню мялямонзон мархта мокшаватненди, штоба Шкайсь кулелезень синь валснон – эняльдемаснон и максоль пизем.
Манттне, конат ульсть озондомань символкс, путфтольхть келуть перьф солярнай знаконь коряс. Манттне меки куду ашесть сявондев, синь ёрдафтольхть эрьхкс. Ваяф мандсь, конань «сявондезе Вядявась», лувондовсь пичефксонь кандыкс. Но тячи киньге мандоц эрьхкти изь вая.
Аделамда меле мокшаватне-озондыхне ярхцасть пачада, симсть позада. Тяфта лафчептозь Ведявать мялензон – арьсеманзон. Ведявати озондомань озксь кочкафоль и ладяфоль культурань кудса покодить Е. Д. Кульковть мархта, а Российскяй финно-угорскяй культурнай центраста съемочнай группась снимандазе тя действать фильмас.
Тя еткть, мзярда етафтовсть съемкат мордовскяй языческяй озксть кеподеманц колга, куженяса озсеф ваныхне шарфнесть оцю мяль моли действлять лангс. Российскяй культурнай центрань специалисттненди и сембе озксонь ётафтыхненди оцю илас саф мокшень ломаттне азсть спасибо.
Сяда меле инжихне тертьфтольхть кувака шратнень вакс, каваняфтольть пачаса, позаса, мезьса козя мокшень масторсь. Оцю инжихнень васьфтезь районнай администрациянь Главать заместителец В. Д. Рузавин, культурань отделть начальникоц Н. В. Кулькова, Вирь Келгуж велень оцюнясь – Ю. П. Нечайкин, конац путсь лама вий тя оцю илать ётафтоманцты.
