Мокша ляйть трваса озада ащесь эряфкшу ломань. Лангсонзоль морской мундир. Пингсь шарфнесь ни сёксе пяли, но кожфса нинге лиендсть салмоксонь салайхть. Кой-конат эздост валгондсть сетьмоста ащи ломанть лафтус, ваймосесть эполетонзон лангса и меки лийкснесть, мзярда ся шерьфнезе ронгонц. Озадось лафчепнезе сивонц, няйф, пингонь-пингонь стакаль тарксемс ваймоц, и тага кашт аф молезь ванць ляйге кевори волнатнень лангс. Кодама мяльхть шарсть ся ёткова прясонза? Мезень колга арьсесь сон? А пади, мезеньге аш. Кинди тяни эрявсть сонь потмомяленза? Санаксарень монастырьста сакалу монахненди? Вежлявста сюконякшни крестьяттненди? Пукшу шабратненди-помещикненди? Ашесть эряв киндивок. Виденц азомс, сон афи латцезе сембе ётафть фкя-фкянь полады ряде, ашезе аноклакшне арьсефонц кадомс лиятненди, мельганза молихненди. Сембось, мезсь инголи пяк кеняртьфнезе, мезть моряса сон тиендезе васенцекс, валомне солась пингонь ляйса, тушендсь алуветть.
Нинге аф кунара ломанць кемась: тя сон сяськсь моря лангонь лама сраженияса, вятнесь киньге эзда аф пели эскадрат, касфтсь ёню командирхт и кораблянь экипашт, ваяфтозе моряса тюремань теориять, панчсь тя тевса од закотт. Тяни сембось няевсь аф афкуксоннекс, тёждянякс, кода салмоксонь салаень патянясь, шерьфтить латуцень – и юмась, бта солась кожфса.
Серцек эряйхне пяк сидеста аф приметнесазь генийть, талантть, сай пингонь содайть. Синь аф маштыхть, а лияета и аф ёрайхть няемс лиянь крхка ёнть, потмовийть, эрьгавшить. Эстедост смузють колга корхтайхть безярдезь, ширемста пеедезь лемнесазь сонь чудакокс, афламода шоворьфкакс.
Синь аф мялезост, мес ваксстост тя ломанць лама тись, лама саться эряфса. Козяшити тонатфненди, вяре ащихненди стака арьсемска, што улихть синь корязост сяда сода, сяда машты ламатть. Кунардонь пингста тячемс азорондонь кошярязь служамс тест инь ёнюфнень и виихнень, тяка пингть ванцть мекольцетнень лангс вярде алу. Властти фалу эрявсть генийхнень и таланттнень сатфкесна, содамоши-на вдь синь кемокснезь, кепнезь вяри марнек государствам. Тяда башка, койкона сатфкене пингонь ётазь ульсть кода азомс эсеннекс. А ся, мезсь стакаль нельгомс, аф няемга шашфневсь шири, юксневсь.
Историясонк аф весть улендсь тяфта: афкуксонь таланттнень и сяськихнень потафнезь фталу, а инголи лисендсть троить маласа пульхкихне, пулонь каннихне. Лияста эсь ломаньконь пара тевсна и славасна питни казнекс повфнесть омба масторстотнень кргас. Конашкава миньцонк кельгсазь тонатнень инголе ёладомать, пильгс комсемать! Воявамась тиендьсы ломанть содафокс. Но народть аф васькафтсак, кит якасть бойс, походе, содасазь вятиснонга. Сяс кашт аф молезь синь нолнезь пряснон, мзярда оцю казнетне пяярезь пяярсть сятненди, кит ашезь никсе порафонь шинетьке. Мзяра «кяльге панчф» азорондась армияньконь и флотоньконь лагса! XVII-це векста кит аньцек тоса ашельхть оцюнякс: «Войнович адмиралсь, Мазини контр-адмиралсь, Фон Дезин адмиралсь, Кушелев вице адмиралсь, Траверсе адмиралсь…» Мезе тисть синь флотть кеподеманкса? Кодама мяляфтови сяськомат сотфт синь лемснон мархта? Аш тяфтамот. А вдь ня ломаттнень эзда ламода ащесь Рооият моряса виец.
